ဓာတ်ပြားဟောင်းကြီးများ
Posted by kaungmalay13 on June 18, 2011
( ၁ )
သားအဖနှစ်ယောက် ထည်ဝါလှပသောအိမ်ကြီး၏အရှေ့ ခုံတန်းလျားလေးပေါ်တွင် ထိုင်နေကြသည် ။ သတင်းစာဖတ်နေသော သား၏ဘေးတွင်အဖေဖြစ်သူက ငြိမ်ငြိမ်သက်သက်လေး ထိုင်နေရှာသည်။ ထိုအချိန်တွင် စာကလေးတစ်ကောင် သူတို့နှင့်မလှမ်းမကမ်း မြက်ခင်းပြင်ပေါ်တွင် လာနားသည်။ အသက် ၈၀ကျော်ခန့်ရှိပြီဖြစ်သော အဖေအိုကြီးက သူ့သားအားလှမ်းမေးလိုက်သည်။
" ဒါဘာကောင်လဲ "
" စာကလေး "
သားဖြစ်သူက ဝတ်ကျေတမ်းကျေ ဖြေပြီး သတင်းစာပြန်ဖတ်နေလိုက်သည်။ ခဏကြာတော့ အဖေအိုကြီးက ထပ်မေးပြန်သည်။
" ဒါဘာကောင်လဲ "
သည်တစ်ခါ သားဖြစ်သူက အနည်းငယ်စိတ်အနှောင့်အယှက်ဖြစ်ဟန်ဖြင့်
" အဖေ့ကိုပြောပြီးပြီလေ စာကလေးပါဆို "
ထိုအချိန်တွင် စာကလေးက သူတို့ခေါင်းအထက်နားက သစ်ကိုင်းပေါ်သို့ ပျံသန်းသွားသည်။ အဖေအိုကြီးက အပေါ်မော့ကြည့်ရင်း မေးပြန်သည်။
" ဒါဘာအကောင်လဲ "
" အဲ့ဒါ စာကလေး အဖေ ....... စာ ... က ..... လေး !! "
အဖေအိုကြီးက ထပ်မေးပြန်သည် ။ " ဒါဘာကောင်လဲ "
သည်တစ်ခါတော့ သားဖြစ်သူက ဒေါသအပြည့်ဖြင့် စတင်အော်ငေါက်တော့သည်။
" အဖေဘာဖြစ်နေတာလဲ ၊ ဒါ စာကလေးပါလို့ ဘယ်နှစ်ခါပြောရမလဲ !! "
ထိုအခါအဖေအိုကြီးက ဘာမှပြန်မပြောဘဲ သူ့သားနံဘေးက တိတ်တဆိတ်ထွက်ခွာသွားပြီး အိမ်ကြီးထဲသို့ဝင်သွားသည် ။ ခဏကြာတော့ သူ့ဒိုင်ယာရီစာအုပ်အဟောင်းလေးကို ကိုင်ပြီးပြန်ထွက်လာသည်။ ပြီးတော့သားဖြစ်သူကို စာအုပ်ထဲမှ စာပိုဒ်တစ်ပိုဒ်ကိုဖတ်စေသည်။
"ဒီနေ့လွန်ခဲ့တဲ့ရက်အနည်းငယ်ကမှ ၃ နှစ်ပြည့်သွားတဲ့ ငါ့သားငယ်လေးနဲ့အတူ ပန်းခြံတစ်ခုထဲ ထိုင်နေ တုန်း ငါတို့ရှေ့မှာစာကလေးတစ်ကောင်လာနားတယ်၊ သားငယ်လေးက အဲ့ဒါဘာကောင်လဲလို့ ၂၁ကြိမ်တိတိ ငါ့ကိုမေးခဲ့တယ်၊ ဒါစာကလေးပါလို့၂၁ကြိမ်လုံးလုံးငါပြန်ဖြေခဲ့တယ်၊ သားလေး ထပ်ခါထပ်ခါ မေးတဲ့ အခါတိုင်းငါဒေါသမထွက်တဲ့အပြင် အပြစ်ကင်းတဲ့ သားလေးအပေါ်ချစ်မြတ်နိုးတဲ့စိတ်နဲ့ ငါပွေ့ဖက် ထား ခဲ့တယ် ... "
သားဖြစ်သူကထိုစာပိုဒ်ကို တုန်ယင်နေသောအသံဖြင့် အဆုံးသတ်လိုက်သည်။ သားအဖနှစ်ဦး ကြား ခဏ တာ တိတ်ဆိတ်သွားပြီးမှ သားဖြစ်သူက အဖေအိုကြီးကိုဖက်ရင်းနောင်တကြီးစွာဖြင့် ရှိုက်ငို တော့သည်။
( ၂ )
အလုပ်ကအပြန်ဘတ်စ်ကားပေါ်မှာမနေ့က Facebook မှာကြည့်ခဲ့မိသော videoတစ်ခုအကြောင်း ပြန်စဉ်းစားနေမိသည်။ ကျွန်မကိုယ်တိုင်ရော ထိုလူငယ်လို ပြုမူဆက်ဆံမိခဲ့ပါသလား။ တစ်ကြိမ်နှစ်ကြိမ် ။ တွေးရင်းနှင့် ရင်ဘတ်ထဲတွင် နာကျင်ဆို့နင့်လာသည်။ မရည်ရွယ်ပါဘဲ ပြုလိုက်မိသော အမှားသည်လည်း တဖက်သားကို နာကျင်စေတတ်သည်။ အထူးသဖြင့်အသက်အရွယ် အိုမင်းသူတွေ။ အသိညဏ်ချွတ်ယွင်းမှုနှင့်အတူသားသမီးတို့၏ အမှုမဲ့အမှတ်မဲ့ဖြစ်စေ၊ လျစ်လျူရှုမှုကြောင့်ဖြစ်စေ အထီးကျန်နေကြတဲ့ သူတွေ။ သားသမီးများဆီကဂရုစိုက်မှုတစ်ခုရဖို့အကြောင်းအရာတစ်ခုကို ထပ်ခါ ထပ်ခါ ပြောရင်း အကြင်နာတရားကို မောမောပမ်းပမ်းလှမ်းနေကြသူတွေ ... ။
ဒါကိုပင်လူငယ်များက စာနာမှုကင်းမဲ့စွာသမုတ်ကြသေးသည်။ ဓာတ်ပြားဟောင်းကြီးတဲ့။ ထိုအက်ကြောင်းထပ်နေသောဓာတ်ပြားဟောင်းကြီးကို ကျွန်မတို့တွေ အမြဲတမ်း ပိုင်ဆိုင်ထားနိုင် ကြပါ သလား။ ထိုဓာတ်ပြားဟောင်းကြီး၏တန်ဖိုးကိုပျက်စီးသွားတော့မှ သိရှိကြမည်ဆိုလျှင် အလွန်ဝမ်းနည်း နာကျင်စရာ ကောင်းပေလိမ့်မည်။ ထိုသောအခါမှအသံမထွက်နိုင်တော့သော ဓာတ်ပြားဟောင်းကြီး၏ အက်ကြောင်းများကိုလွမ်းဆွတ်တမ်းတနေရတော့မည်။
( ၃ )
ဘတ်စ်ကားကမှတ်တိုင်တစ်ခုမှာရပ်ပြီးပြန်ထွက်ဖို့ပြင်နေပြီ။ သူ့အလိုလိုပိတ်သောတံခါးတစ်ချပ်ကို ကမန်းကတန်းလက်ဖြင့်တားလိုက်ရင်း လူတစ်ယောက်အထဲဝင်လာသည်။ပြီးတော့အမျိုးသမီးများသီးသန့်ထိုင်ရာသို့ လှမ်းလာပြီး ကျွန်မနှင့် မျက်နှာချင်းဆိုင်တွင်ဝင်ထိုင်လိုက်သည်။ ထိုသူမှာ အသက် ၈၀ကျော်အရွယ် အဘိုးအိုတစ်ဦး ဖြစ်လေသည်။ သည်လိုအချိန်မျိုးတွင် သူနှင့်အတူ မည်သူတစ်ဦးတစ်ယောက်မျှ ပါမလာခြင်းအတွက် ကျွန်မအတော့်ကိုအံ့သြသွားမိသည်။ ရာသီဥတုကလဲအတော်ကိုအေးသည်။ ပြီးတော့ဒီအသက်အရွယ်နှင့် အဖော်တစ်ယောက်မှမပါဘဲဘတ်စ်ကားစီးဖို့မသင့်ပေ။ ကျွန်မသည်စိတ်မကောင်းခြင်းကြီးစွာဖြင့်အဘိုးအိုကိုငေးကြည့်နေမိတော့ အဘိုးကခွင့်တောင်းသည့်မျက်ဝန်းများဖြင့်ပြုံးပြနေသည်။ သူ့မျက်နှာပေါ်တွင်ဖြတ်သန်းလာခဲ့ရသော ဘဝ၏ အချိန် အတိုင်းအတာ နှင့် ညီမျှသော အရေးအကြောင်းများ။ သူ့မျက်ဝန်းများက ပင်ပမ်းလွန်းသဖြင့် မီးခိုးရောင်ဘက်တောင် သန်း နေသည်။ မကြည်လင်တော့။ ဘတ်စ်ကားပေါ်မှာမို့ကျွန်မ၏သိလိုစိတ်များကို မနည်းပင် ချုပ်တည်းထား ရသည်။ ထိုအဘိုးအိုက ကျွန်မဆင်းမည့်မှတ်တိုင်မရောက်မီမှာပင် ဆင်းသွားခဲ့သည်။ ကျွန်မသည်ထိုအဘိုးအို၏ကျောပြင် ကိုမီနိုင်သလောက်ငေးကြည့်နေမိသည်။ ခဏကြာတော့ ကျွန်မ၏ မြင်ကွင်းထဲတွင် အဘိုးအိုလဲပျောက်ကွယ်သွားခဲ့သည်။ သို့သော်ကျွန်မကတော့ မဆုံးနိုင်သော အတွေးများစွာ ဖြင့် ကျန်ခဲ့လေသည်။ အထူးသဖြင့် တစ်ခုခုကိုနင့်နင့်နဲနဲတွေးရင်း ငေးရီနေကြတဲ့ သူ့မျက်လုံးတွေပေါ့ .... ။
kaungmalay 13
Posted by kaungmalay13 on June 18, 2011
No comments:
Post a Comment